រថយន្តស៊ីរ៉ែនបង្កគ្រោះថ្នាក់ចរាចរណ៍ រួចបើកគេចចូលទីបញ្ជាការប៉េអឹមខេត្ត

ខេត្តបាត់ដំបង ៖ ប្រភពឱ្យដឹងថា រថយន្តស៊ីរ៉ែនមួយគ្រឿងដែលគេសង្ស័យជារបស់មន្ត្រីប៉េអឹមខេត្ត ដែលពាក់ស្លាកលេខខេមរភូមិន្ទ ៣៦០៧ បានបើកបុកអ្នកជិះម៉ូតូ បណ្ដាលឱ្យយុវជន២នាក់រងរបួសធ្ងន់ កាលពីវេលាម៉ោង០៦ និង៣៥នាទីព្រឹកថ្ងៃទី០៧ កុម្ភៈ ស្ថិតនៅចំណុចភូមិទួលតាឯក សង្កាត់ទួលតាឯក ក្រុងបាត់ដំបង ដោយរថយន្តបង្កបានបើករត់ចូលទីបញ្ជាការប៉េអឹមខេត្ត ។

ប្រភពមន្ត្រីចរាចរណ៍ឱ្យដឹងថា រថយន្តប៉េអឹមបានបើកបុកម៉ូតូទាំងកំរោល នៅចំណុចផ្លូវបំបែកជា៤ ខណៈធ្វើដំណើរឆ្លងកាត់ទទឹង
ផ្លួវ ។

គេឃើញរថយន្តបង្កធ្វើដំណើរមកពីលិច ទៅកើត រីឯម៉ូតូជិះឌុបគ្នា២នាក់ ពីត្បូងទៅជើង តែដោយសាររថយន្តបើកលឿនជាន់ហ្វ្រាំងមិនទាន់ ក៏បុកម៉ូតូទាំងកំរោល ហើយបើករត់តែម្ដង ខណៈដែលយុវជន២នាក់ បានរបួសបាក់ដៃ បាក់ជើង ហើយត្រូវសមត្ថកិច្ចចរាចរណ៍ដឹកទៅមន្ទីរពេទ្យភ្លាមៗដែរ ។

បច្ចុប្បន្ន គេមិនទាន់ដឹងថា តើសមត្ថកិច្ចចរាចរណ៍ដោះស្រាយបែបណាទេ បើរថយន្តបង្កពិតជារថយន្តប៉េអឹមមែន ហើយពេលនេះត្រូវគេសង្ស័យថា រថយន្តបង្កនេះកំពុងសំងំលាក់ខ្លួននៅទីបញ្ជាការប៉េអិមខេត្តទៀត ។